الناس ما خلقت حواليك ترضيك..

الناس ما خلقت حواليك ترضيك..

مثلك.. مقادير الولي تعترضها..


أخير لك لا تندفع في هقاويك..

تلمّس الأعذار.. ولا افترضها..


مافيه شي إلا ليا راد واليك..

ولا فيه صعبه كان ربك فرضها..


اللي ماتقسم ماتجي في مراميك..

لو كان تلحم بندقك وتحفظها..


ورمي الركاده غير رمي التماتيك..

والفرق في هذي وهذي.. غرضها..


اكحل عدوك من سعادة مصافيك..

ولا يشغلك غيب القلوب ومرضها..


يظهر صديقك ويتبين معاديك..

وكذا الحياة.. بما تلاقيه خضها..


وسّع مفاهيمك.. وجوّد مباديك..

وكرامتك عمّا يشوب.. انتهضها..


دايم.. جناحين المعزّه تعليك..

بالك لحاجات النفوس تخفضها..


إلا الوفا.. خل الوفا في مساعيك..

عملة رجال.. اتعدها وتحفظها..


يا صاحبي في وقفتك كيف أجازيك..

وأنا أدري إنك ما تدور عوضها..


ما يجعل الأحرار مثل المماليك..

إلا معاريف الرجال ببعضها..