قلبي يزوم وزود طيشه بلاني =وطير النيا يمكن رجع عقب ماغاب توه قضيب وزاد بالأكفخاني = سبقه قصير وماقعه دون مقضاب قلت الفرج بالقافيه واكتباني= دام القلم مطواع والحبر سكاب ياراكبا من فوق بنت العماني =حول الرباع وتو ماشقّت الناب فيها من العيرات وقم الثماني=محفوضة التاريخ ميلاد واضراب بنت القعود اللي يفك القراني=مرباه شط النيل مرتع ومشراب ضريبته بالعيش صعب المجاني=تدفع لنا غصبا على قوم غصاب يشهد لنا راعي نفي بالاغاني=وحمود ناصر وبن ملحم وحطاب عيونها جمر الغضا الشلهباني=في جورتاً مابين كيراً وشباب فقس العلابي ثم عكف الاذاني=راس الخبير اذا وقف واصلح الكاب مبرومة الفخذين والزور باني =بينه وبين اكواعها قفلة الباب شيب الشواغر مع مميل الثفاني=عراضا مرادفها كما قار ديراب الصيعريه للعصا ماتداني= ولاهي من اللي يشعبونه بمشعاب تلمح مذانب عينها الخيزراني=هاجت وماجت ثم ساجت بضبضاب عقب الربخ ساج الحقب للبطاني=شابت مرافغ بطنها والحقب شاب ان درهمت بك مع سماح المتاني= وحان المسا والدرب عثعث ودبداب يزيدها شوف الظلام جفلاني=كن السعارة ينهشنه بالانياب تزلف على اللي سيرها بروجاني=فريد من سرب القطا شافها عقاب وكل ما قربها زادها بالجناني=تزيد مع لفح الهواء والهواء هاب حدا نظر خشما عفر مشفقاني=حصا وبر كن النحر باب خشاب تقدم على السرحان بالهوذلاني=ينزّى الحصا من خفها تقل مشهاب صفق الهواء بجنوبها بصفحاني= صفقات معصيراً على صوب مزراب دقات قلبه بالضلوع الحواني = ضرب الدفوف بعرس تلعات الارقاب مزبان مدمياً بعيد الطناني = لحم ودم وروح وتثير الأعجاب بالشد لاترغي ولا مضبحاني = مثل الهنوف اذا استحت عند خطّاب وأن مس حبل شدادها بالمثاني = تبدي الرضا بسكات بعيون عتّاب ترطن رطين مترجمن طرطماني = شاف المحرك عاطلا فيه لولاب تشدى لشاحوفا بعيد المواني = حس الخطر من زورقا جاه قراب شاف الخطر بالعين والموت داني = وتو البحر ماهاج والبزر كباب الجم راكد والمسير ركزاني = صفق المراوح بالبحر صفق مغراب مارافقت قفلا ولاهي بواني = ولا شدها راع الزماميل حطاب ولا دربوها ملاعبين الغواني = عفر النظر مايركبة كل ركاب مرباعها بين العلم والجراني = ومقيضها بالهوج والبرق معزاب في ضف نجعا يكسبون الرهاني = أن صار يوما بين مروي ونداب ركض النعامه بالحفا واللياني = وحبل الرسن مايقضبة كل قضاب مايشتريه التاجر المربحاني = أيضا ولا تهدى على كل طلاب تشبه عوارض ساقها الشيشخاني = وسم السليم بنصفها كنه الداب يوم الحرايب والعدا من زماني = مدربينه بين غزوة ومطلاب نلحق عليها راكبين الحصاني = وصفرا يكضمن ألأعنه بالأجناب ماقلت فيها عيب للمودماني = الجيش هن والخيل من ضمن الأسلاب ومن قال عيب قلت فيها مثاني = على الخبير المبتدي ذكر الأسباب دليلها واحد من الكوكباني = الجدي ولا سهيل كان القمر غاب حطت نحرها في سهيل اليماني = ولو شفت اثرها قلت مضراب نشاب من ساس ضمّر جرد ماهن بداني = تلفي لشمر من مشاهير الأقطاب أهل اللحيسا في كبار الصياني = أرداهم اللي للغنم تقل قصاب يقلطون العيش مع فطح ضاني = وعذرا سمينا فوق كلماتاً عذاب يستعملون الهيل والزعفراني = في دلةٍ يطرب لها كل شراب الهيل هندي والمسمى أسباني = وقهوة عدن فنجالها كنه خضاب غلبا بطاين جوخها الأرجواني = كم شيخ شغميما غزى يمها وتاب راع المطية عارفا بالمكاني = يرفق له العنوان مع كل دراب ببلاد سنجاره عليها الأماني = وعند الحسيني له تحية وترحاب الأشعل الفيصل عفيف اللساني = قول الكلام بلطف من ضمن الأداب قل السلام وشير له بخضعاني = وقل التحية يازبن كل منهاب أحلى من السمن العريب العداني = ومن درة الخلفة على بيض الأنياب من واحدا يسألك يالترجماني = عما ذكرته باليمامه بالأعراب ان كنت تعرف صنفنا من الدواني = استر علينا يسترك رب الأرباب قلت اللحاوي بيطري بالزماني = يجبر كسور كروش يوم السهم صاب أسألك عن قولا نشرته دعاني = أشره عليك ورد في صدق وأيجاب من نجّح الدكتور بالأمتحاني = وفي اي معهد دارسا علم الأطباب عسى شهودك من بعاد العواني = أو الشهادة عندكم وسط دولاب من قال قول يدعمه بالبياني = ولا عليه الحق يلزم ولو غاب سبيتنا وأعطبتنا بالهواني = مسبةً تبرى الحشى تقل تيزاب والسب شوك الكبد منكم كواني = مسمارها حامي على عرق صباب وان كان حضك يحتملها ثواني = تلقاه قدامك وانا خاطري طاب عقلي ثقيل وحجتي في لساني = ماعاد نخضع للأسامي والألقاب نصبر لها دام الذي كان كاني = ولا نبادلك في منطق فيها الأنشاب لعل انا ماشوفتي بالأداني = وأدراك عن قول ترى فلان كذاب ماني بشيمات العرب مسرداني = ندري الحضوض ونحسب القول بحساب احسب خطايه واقتصر بمشياني = اخاف زلات القدم يوم نرتاب وكلام جهّيل العرب بوبهاني = ملح البحر وان جاه زوم البحر ذاب ولو قال دواس الشعيلي معاني = ساعدك بالدقه على وتر لعاب يالأجودي ماشيخنا مشبهاني = حتى يعالج خيلكم عندما تصاب هذا اللحاوي يالسنافي ضماني = زعيم كلب ويعرفه عكف الأشناب قرمٍ صميدع قاطعا صيرماني = من خلقته مالان راسه للأرهاب ينطح نحور مربعات القطاني = نطح الزناتي خيل ابا زيد وذياب ومن صار قفو حصانا بالعلاني = عليه لايامن مضاريب الأسعاب (وهنا يذكر شاعرنا قصة ابن دعيجا مع عبدالكريم الجربا الملقب بأبو خوذه واللتي سوف اوردها في هاذا الموضوع) وان كنت تطعن في نسبنا تراني = اعطيك علمٍ بالمراجع والأنساب حنا عرب وساسنا بقحطاني = مكتوب في صافي الذهب بأوسط الطاب في شجرة الأمه بهاك المكاني = مكتوب بالبردي ومنحوت بهضاب كلب ابن وبرة جدنا وشهواني = مركز قضاعه ماسكينه بالأطناب وفي دومة الجندل لنا رمز ثاني = اسم صنمنا ودّ في راس مرقاب تركع له ارقاب العبيد اركعاني = وكيدر الكندي بنا فيه محراب وان كان ربك مصطفيك اصطفاني = الفرق بالتقوى والأعمال بكتاب وشرار مهو اسود وطيّ بيضاني = ولا جدنا صقرا ولا جدك عقاب آدم ابوك وهيكلك مودماني = وحوّا احملت بك عن طريقه بالأخصاب وانا شريكك في نسبهم ولاني = من كوكبٍ ثاني على الارض طبّاب وأراك يالممدوح كما تراني = سنا بسن ونشلع الناب بالناب وأن كنت تقصد بأرضنا بالسناني = أسأل عبكلي ليش يمشي بمصلاب جانا معه غضبان هو والدماني = وضرب الهنادي كنها لعب طرناب وحصل اخو عليا على الساق شاني = وخلا بعض ربعه وهو راح منصاب امضى حياته مشيته بعرجاني = ولا يصلح الحداد عظما بسكراب وابن رخيص اللي نخانا عياني = جيناه في شلفٍ شطيرات وحراب وجبنا له المجمول صافي الثماني = بنت الشمالي يوم عيا بالأحباب بيت العياده من كبار المباني = نخبرك عن نسله الى قيل من جاب ومن حط بقنيطير بزر الاوماني = عقيد شمر بين منكف وكساب حيثه هجم عقب العهد والأماني = في ساعةٍ تصعب على كل مرعاب الشلف فيها كنه الديدحاني = من دم عصمان الشوارب اذا ساب زادن عليه المترفات انعياني = مثله فقيد ومثلهن شق الأجياب في راس ودعه مدفنه الصمصماني = من خوف لاياتيه نسر ولا غراب نكرم كريم القوم لو كان فاني = ولا همنا بأفعالنا قول هزاب ولو تسأل الهربيد قوله كفاني = من اللي جرى ببلاد كلب وكلاب بأيسر مكيحيلا بحد الطماني = يوما جرى لعساف في قيض لهاب شيخ السويد مزهبين الرداني = مع دربهم تلقى الحوارين ذهاب أغواهم الضمران والقحوياني = وبرقا يغرد طيرها بين الأعشاب وغزوهم اللي يقطعون الشطاني = ولا صح لأسماعيل وسعيد مهراب ومن سبب الشيخه على المكلماني = حتى يشبة بالفرزدق وزرياب ومن زهب سويلم بسمح ودهاني = من بعد منعه وأطلقه عقب ماطاب صميدعا بالحرب ماهو هداني = قاد السويد لحربنا مثل الأسراب ولو تسألون عبيد من راح عاني = لعل يلقى أخوه من بعد الأتعاب في سهلة تبعد عن مريغاني = حروة ثمان ايام للنضو مسحاب بديرة منزحة العدا بالطعاني = يردون حوض الموت كان الردي هاب حول يرد الخيل واصبح يعاني = من جرح سيفا صار له في مضراب واقفن بربعه حرد شوف العياني = وأبا الكحل خلا الشويب وهو شاب وعبيد ماجانا بقلبه حناني = ألا عدوٍاً ياخذ الناس نهاب لو كان مسلم مذهبه شقلباني = مثل البوادي من شبابا وشياب جرد علينا بالسيوف المحاني = بأربع جموعا كاملة خيل وركاب على الشقيق وكل قاصي وداني = يعرف نتايجها على حصان الأطلاب وكروش جتنا منوة بالتماني = في ساعة مابين بايع وجلاب فيصل طلبها ثم شيخ قحطاني = وسلطان تركيّا رضانا بلا غضاب وحنا خذيناها عيانا بياني = غصبا بلا طيب بسيفا وجلباب وسقنا ثمنها غاليا بالمكاني = صوارما من مزرعة بيض الأتراب وطقوا عليها كاسبين الأغاني = ماهي وداعه من محب لحبّاب دكتورنا يذكر قليل الأماني = كيف استحل كروش والجرح ماطاب وعيا يرد كروش لعبيد ثاني = ولا هو بحال اللي كما النمر وثاب ثم انجبت الصفرا تتل العناني = تل الفحل وقت الهدد حبل جذاب وسلطان تركيا بعيد رمضاني = نزل علينا بين ذيبين ورحاب وقيدت عليه برفقة السلوعاني = نضو النضاءالمعروف من نسل عيداب وجانا بدلها الجوخ والجبخاني = ومزارعا بين الزبيار وسحاب في ديرة البلقاء براس القناني = مسجلا عند اللحاوي بها طاب وأن كنت كاذب هذا انا جيت عاني = عنها اخبروني ياملا ذكرها غاب مادام مابيعت على مريبحاني = ولا مير ماتت عندكم شقر الأهداببثبات ماني فارسا مهلقاني = قوله طباطيبا على طبل طبطاب والطيب وهبة في رجال الصخاني = مهو لحزب واحدا دون الأحزاب وكسب المعارك حظ مابه نواني = مقسومة مابين غالب وغلاب وحنا شربنا الصافي الريهجاني = وعطشاننا مايشرب التول وان شاب وابن رشيد أمير ذرب البناني = شيخا على شمر صناديد الأعراب خلفة عطية من عيال شهواني = يرسلة البرواد عنتر وقرضاب وحنا رفضنا طاعته بعصياني = ومن غيرنا ياخذ نصابين ونصاب يالأخ لو نجفل من القرقعاني = لقيتنا عند البذاذيل ربّاب والناس كلا عزتة ماتهاني = وكلا على حقه عن الظلم والداب وان كنت تطعن في كرمنا عساني = اشرح لك الموضوع في بعض الأوجاب مير اسأل الجربا كثير الأواني = جد أبو خوذه في عطاياه وهاب هو شاف بسيطا بوسط الصياني = البل كبار الروس من عوج الأرقاب تسعا سداسيات شقحا سماني = وتسعا رباعيات وأيدامهن راب لامن حطب في جرهداً سبسباني = ولا من هوادي مير للقدر مركاب قدورا من المصنع حلقهن ثماني = من كبرهن ماحولن عند رباب تبرك بهن هنف الخشوم بركاني = تنزل بكلاّب وترفع بكلاّب تركب على روس النياق المقاني = مثل الهضاب ونارهن سمن وثياب خاما من الطابات دون ذرعاني = يرمى على وسط اللهب واللهب شاب له بالمثاني تاج وعويرجاني = من سوق هجرا يلبسه كل نصاب النار زادت بالظلام شعلاني = خام العقيلي يلتهب دون شباب يوما بعض الناس ياكل شناني = ولبسه من أوراق الشجر هي والأعشاب فقيرنا لو هو من الفقر واني = للنار شبّاب وللسمن صبّاب طبع الكرم يفتق عليه العراني = للزاد بذالا وللدر حلاب مايجمع الحميض وزعيتماني = على الجراد ويخزنه تحت سرداب ولا يعرف الفردة ودخن اليماني = وكلا بما عنده كريما اذا طاب ولا اقول زدنا عن جموع الكياني = مثل الرجال وللكرم عدة ابواب الجود من الماجود ماهي تماني = الناس هم الناس والوقت قلاب ولي لابةٍ لو قال فيها الفلاني = في بندقة يرمي الهدف مير ماصابوبالحرب يروون الغلب بالطعاني = وبالسلم خلوها لفكاك الأنشاب سلطان نجد اللي حماك وحماني = صقر الجزيرة له جناحا ومخلاب من هيبته خلا الذيابه حصاني = واسود بقعا لولصتله بالأذناب السيف والقران متبارياني = في بقعة الرحمان والظن ماخاب يحكم بها القاضي على كل زاني = ويطرد به الخازن اذا كان نصاب يعل حكمه عندنا سرمداني = ليوم القيامة مابنا كون وحراب أرض الجزيرة سهلة سمهداني = من عقب ماهي للشياطين ملعاب دام الحسيني من رجال المعاني = ومن روس سنجاره عريبين الأنساب يكرم عن اللي مهنته مشنواني = وراع النقيلي بين وارد وعزاب في اصابعه يضرب بوتر الكماني = ويعتز في نفسه وللغير شذاب كل البشر دونه وهو بهلواني = وحط المراجل كلها بس بجراب فرعون حط بهيكلة مومياني = وباقي البشر عنده براغيث وذباب خلا مواريد العرب تركماني = وخلا الغجر من نسلهم هم والأصلاب واذا طلبته حق زاد رمحاني = يقفز عن الحجه كما قفز سنجاب يقول قالو لي وانا اقول ماني = مسؤول عن قول سمعته بالأكذاب ولا فيه رجلا جاهلاً بالمعاني = ألا الذي مرباه مستشفى الأعصاب لو جيت قصرا عاليا بالمباني = تأتيه مع الشباك ولا مع الباب مايركب الطيران كود اجذواني = ولا الرجل له بالسهل كل مشذاب الماي مايطلع بقلص السواني = لولا حباله والمحاله وجذاب ولا تركب المهره بليا عناني = الكذب ينفاه الأجانب والأقراب هذي فعايل لابتي وانت جاني = واللي نقص حق الأجاويد مايثاب وتقول مالنا يافتى الجود شاني = عسى لنا عندك تواريخ وكتاب وقول العوج ياطير شلوى حداني = يمك ولا خليت لي عنك مجناب وربطت عن مسة شرفكم لساني = كما فعلتوا والشرارات غياب ماهو بقل عيوب حسب عرفاني = الكامل الله والبشر يرجع تراب كتمت سري لو الأشعل جفاني = حيث أن قلبي له علاقه وضّباب ولو كنت مثله كان انا من مكاني = اكشف خفايا خزنةٍ دونها احجاب وياطاه من وسط الملا ما وطاني= مير الحيا من شمراً صار منشاب لولا الخجل من لابته والعواني = وخطو الكلام من الرجل فيه ينعاب لسقيه كاسا فيه خمر سقاني = وياحلو ردت مليها بفم شراب ولو قلت في طي الخطا ماشفاني = ولا يعذرون الناس لو جبت ماجاب ولو اكسي الخياط مما كساني = النار لو جت بالسبط جت بالأخشاب ولو المغني قال ياليل داني = ترقص له الدنيا على الدبك بأعجاب ومن دش بالمحفل غدا مطرباني = لو كان في ماضي حياته بمحراب قلت الصحيح وخيرة العمر فاني = ويموت راس الداب والسم بالناب ومن بعد هذا لو تجي وتهجاني = ماياصلك مني مردا ولا عتاب أربط حصاني لايزيد هذباني = ولا نقبل كحيلان ون كان هذاب ما بالمرادد خير كود هذياني= الفرق شاسع بين مادح وسباب وعبرت من وسط المحيط سبحاني = وتصعب مرافقتي على موج عباب وصلت خطي للرجال الذهاني = أهل العقول الراجحه شيب وأشباب لعل فيهم قاضيا مسلماني = يفك عرض هديب من ظلم هداب ويقدرون مجاملي وسكتاني = عنهم وانا من يلقي الدرس بسهاب ياسيل سلمى لاتزيد طفحاني = ماعاد لك في ضلع حلوان مدعاب وختمت لحني بالأدب وقصداني = بأزكى سلاما نبعثه يم الأحبابهنا ابي اذكر لكم قصه ابن دعيجا الشراري اللي موجودة بالقصيدة وهي ان في احد الايام ذهب رجل خالدي الى العراق عند عبدالكريم الجرباء (الملقب بأبو خوذه وقيل انه لقب بهذا اللقب لأن كل من طلبه شي قل له خوذه أي خذه) (مير اسأل الجربا كثير الأواني = جد أبو خوذه في عطاياه وهاب) وتفاجاء بان الجراء صغار الكلاب تسكن بالفضله بقايا الارز (ونجد في ذيك الايام جوع) وسأله الجرباء بعد أن لاحظ تعجب الرجل بكرمه من اكرم الناس فرد الخالدي متهرب من الإجابة عيال العجز يعجزون وحلف عليه الجرباء ان يجاوبه وكان الجرباء يتوقع ان يكون هو أكرم رجل بوقته وبعد الحاح من الجرباء قال الجرباء فيه اكرم مني قال الخالدي نعم فيه فيه ابن دعيجاء الشراري( وكان حكم الخالدي أن الكريم اللي يضحي باللي عنده غير اللي يكرم وعنده الشيء الكثير) فغضب الجربا وقال يالله مشيناء لأبن دعيجاء قال الخالدي وين ياطويل العمر انا جاي للعراق اترزق الله قال الجرباء نروح لابن دعيجا بدون يدري عنا و نشوف اذا الكلام اللي قلت صحيح والله انه هي غناتك وان كذبت ابي رقبتك وراحوا الى ابن دعيجا وكان قد رحل وانتصف في منطقه تعرف (ببسيطا) وهي الآن تابعة الى منطقة الجوف مساحتها تقرباً 100 كم × 100كم لايوجد فيها حجر ولا شجر ابد أي انك لاتسطيع ايقاد نار لسببين : الاول لا يوجد حطب . الثاني لا يوجد حجر ليركبوا عليه القدور ابداً وبسيطاء معروفه بالشي هاذا وكان عند ابن دعيجا ضيوف من العقيلات اللي يبيعون الخام ويجيبونه من مصر وغزه الى نجد وعندما ضافوا ابن دعيجا لم يخبروه با لسالفه وذبح من البل ليجعل روسها مراكيب للقدور وشحمها يدهن به الخام اللي مع العقيلات وقد اشتراه منهم كله ويشعل النار تركب على روس النياق المقاني = مثل الهضاب ونارهن سمن وثياب خاما من الطابات دون ذرعاني = يرمى على وسط اللهب واللهب شاب النار زادت بالظلام شعلاني = خام العقيلي يلتهب دون شباب (وقد ذكر لي أحد الزملاء من قبيلة الشرارات ان الجرباء ارسل احد رجالة قاله شوف ويش يسون فقاله ياطويل العمر شفت مصيبة وذكر ان اللي النساء اللي يطبخون صار لونهن اسود من دخان خام العقيلي) وكافأ الجربا الخالدي وسأل ابن دعيجا السالفه فاخبروه وقال ابن دعيجا بما أنك ذكرتني في مجلس الجربا والله اني لااكافئك
