مرت سنه تلميح من دون تصريح واليوم ابعلنها صريحه صريحه ماني خوي مدورين المفاطيح اللي هقاويهم صحون الذبيحه انا خوي مبعدين المشاويح اللي لهم كسبة نعم والمديحه الوقت فيه الناس راحوا مشافيح كلاً على دنياه تسمع فحيحه يالآدمي دنياك زرعة فلالايح وعمرك مثل غصناً هبوبه تميحه ان طال عمرك فالمنايا ملاقيح ولابد من يومٍ عسى الله يبيحه والنفس مثل الارض تحتاج تصليح احرث ثراها وسقّها بالنصيحه واحذر يمرك يوم من دون تسبيح ونفسك لذكر الله لاتصبح شحيحه وترا صلاة الليل مثل المصابيح نورٍ على دربك وهمك تزيحه وان شفت ميلات الوجيه المكاليح عنهم تبعّد وارض ربي فسيحه وان جاك من يم الموالين تجريح الصبر طبٍ للقلوب الجريحه واللي يشرّح قدامك الناس تشريح لا اقفيت يلقى فيك مايستبيحه وارفع ولد عمك عن القاع لايطيح اللي سواته مايسرّك مطيحه وخلك على ربعك مثل عشبة الشيح يلقابها ثنتين نفعه وريحه لاتنخدع فالوقت وتلوم وتصيح اطلب عسى مولاك همك يزيحه قدمك مع الايام رحنا مدابيح وشره بنا المترديه والنطيحه تلفي علينا ايام فيها تباريح واحيان تلفينا ليالاً مليحه تلعب بنا الايام لعب المراجيح وتهيض من جور الزمان القريحه تجارب الدنيا عطتنا مرابيح ولا ربحنا غير من عقب طيحه وحمى الجسد لابد يطلع لها فيح وترى مريض الصدر يسمع كحيحه والطيب رجمٍ فيه تلقى الطحاطيح ماكر قرانيس الوجيه الفليحه وخطو الولد يتعب ورا هبة الريح امايحصل نعم والا قميحه
