البارحه ساهرن والليل طال ******اخيل بدر السما لين احتجب ذكرني اللي مضالي من ليال******واليا مالي على الدنيا عتب سيرت فيها وشديت الرحال******من سار مثلي لقى فيها العجب ان كان طاف الجنوب مع الشمال******للشرق شرق وفالغرب اغترب ياناصر اوصيك في بعض الخصال******لاتاخذ السالفه لعب وطرب يالي تجودت في عم وخال******ان طحت مايرفعك زين النسب بالدين ربك رفع عبده بلال******يوم النسب ماشفع لبو لهب بلال مثواه جنات وضلال******ابو لهب منزله دار اللهب لاتعتذر فالقدر في كل حال ******الله جعل كل شي وله سبب احذر مماشات اهل قيل وقال******من جاور الجرب يبلا بالجرب اهل الشجاعة تبينها الفعال******انشد هل العلم واقرا فالكتب قوم تعقل عداها بالعقال******تثني رقاب الاعادي والركب وناس عليهم يعيلون العيال******عيدانهم مثل عيدان القصب وناس تجي مثل راسية الجبال******اللي قممها مناطحة السحب وناس تجي مثل كوز من الرمال******ان هبت الريح ميل وانقلب لاتنخدع بالحديد اللي ثقال******شيخ المعادن يسمونه ذهب والحر زايد على باقي الجمال ******والعود زايد على باقي الخشب والخيل عند اهلها مال وجمال ******ماهي كما الي تحمل بالقرب من كل شي يجي واطي وعال******وفي كل شي يجي راس وذنب وراس الرجال صلاح وطيب فال******ترفعك فوق المناصب والرتب والجود بين ولو من غير مال******نور من الله ليامنه وهب مبداه يغنيك عن صفر الدلال******وشبة النار تغني عن شبب اختار في مجلسك بين الرجال ******لا تجلس الا مع شيوخ العرب ولا تهرج ان كان ما جالك مجال******وليا هرجت التزم حسن الادب خلك محافظ على صدق المقال******عيب على الرجل اذا قالوا كذب خلي جوابك على قد السؤال******ما كل صيده تتعب في الحطب دن الحطب كان صايدلك غزال******واما الجراد بلاش من التعب واحفظ لسانك ليا طال الجدال******لا يستفزك ويعميك الغضب وتقوم ترميها وقت انفعال******وتجيك في الذقن والا في الشنب كم من قصيره تكفي عن طوال******وكم من طويله توردك النشب ركز عيونك على شوك السلال******قدام تقدم علي جني الرطب وضحتلك بالدليل وبالمثال******هذي السلامه وهذاك العطب واعرف ترى كل شي للزوال ******ويا سعد من كان صابر واحتسب منقول