تعبت من تعديل بعض العلاقات

تعبت من تعديل بعض العلاقات
...اللي تبي كل أربع أيام تعديل
وتعبت أصامد طيش الأيام بسكات
...وأنا مانا أتعب في وجيه الرّجاجيل
وتعبت من حب على غير مشهات
...وأنا اعتزلت الحب وملاوع الويل
أثر المحبة فالزّمن ذا دعايات
...وحنّا بجيل وصادق الود في جيل
اللي يقول أنّ الوفا حي ما مات
...كنّه اللي شاهد في الضحى نجمة سهيل
إمّا تأثّر بالقصص والروايات
...وإلا مع اللّي صدّقوا كذبة إبريل
ياما سهرنا والسهر بعض الأوقات
... ما من وراه إلا الشّقى والغرابيل
وياما كتبنا يا قصيدي والأبيات
...في غير أهلها ما تردّ المحاصيل
بنات فكري خيل مربط جزيلات
...ماهو بمربط أفرق السوم وتشيل
نعسفها عسف المهار الأصيلات
...إيلين ملينا من عسافة الخيل
ياليل جفني من عنا الوقت ما بات
... كن في ضلوعي دق نجر ومعاميل
ليت الغلا للي تودّه من الذات
...يمحاه صبري والليال المقابيل
لو البكا بيفيدني، رد الأموات
...ولو الجفا بيضر ما عاد بي حيل
تدري البكا من سابع المستحيلات
...عيّت عيوني ترخص الدمع ويسيل
سلّم على اللي تحسبنها إلى جات
...بتعين ضلوع جفتها مداهيل
يا رخصها من عقب ذا الليل بالذات
...ويا غليها غلياه قدّام ذا الليل
رح قل لها لبلادها (ست) رحلات
...تختار وتعجل ومن دون تأجيل
تقفي ولا تكثر علي التلفات
...أهل مصر ما تبكي إلا على النيل
ما عاد عندي غير قطع العلاقات
...اللي تبي كل أربع أيام تعديل
منقول